Geluk, geluk en nogmaals geluk! Die Noordwes-Universiteit (NWU) se dr Adele Broodryk, 'n senior lektor by die Skool vir Menslike Bewegingskunde aan die Fakulteit Gesondheidswetenskappe, sal altyd deur die geskiedenis onthou word as die eerste Suid-Afrikaanse vrou wat die 2022 Comrades-marathon voltooi het.

Sy het ook algeheel derde in die vroue-afdeling met 'n tyd van 06:26:35 geëindig. Wat hierdie prestasie nóg meer merkwaardig maak, is dat dit die ma van twee se eerste Comrades-marathon is.

Die inhuldiging van dr Bismark Tyobeka as die derde visekanselier van die Noordwes-Universiteit (NWU) is die begin van 'n opwindende nuwe reis vir die universiteit.

Dr Tyobeka, wat sy vyfjaartermyn as hoof en visekanselier op 1 Junie 2022 begin het, is amptelik op 26 Augustus tydens 'n prestigegeleentheid by die Feather Hill Hotel en Venue in Potchefstroom ingehuldig.

Pot, stel en wedstryd. Die Potchefstroomkampus van die Noordwes-Universiteit (NWU) is gaan die land se voorste tennisbestemming word wanneer vyf nuwe kleibane voltooi is. Hierdie bane, saam met tien hardebane en twee grasbane, maak dat die NWU ongeëwenaar is vergeleke met die aanbiedings van ander instellings wat bane en geriewe betref.

Die NWU is alreeds ’n gesogte gasheer, danksy die suksesvolle aanbieding van talle nasionale en internasionale toernooie soos die Davisbeker-uitkloprondte tussen Suid-Afrika en Nederland.

Ons wêreld beweeg al hoe vinniger, en deur al die eeue van ons bestaan, kon ons nog nooit so vinnig soek, so ver reis of so diep delf nie. Ons het in die laaste eeu alleen ’n verbasingwekkende toename in die insameling van data gesien, en ons kan ongelooflike hoeveelhede inligting stoor om ons te help om bekende en onbekende probleme op te los. Die vermoë om hierdie geweldige hoeveelheid data optimaal te benut sal op ’n stadium buite ons bereik wees, maar nie buite die bereik van die instrumente wat ons gemaak het nie.

Hierdie tyd van die jaar klou die humiditeit in Nigerië se hoofstad, Lagos, soos kleefgom aan jou lyf vas. Dit is drukkend, aanhoudend. Dan is daar Benin, Nigerië se susterland aan die westekant, net ʼn duisend kilometer bo die ewenaar. Die hawestad Cotonou is vasgevang tussen die Atlantiese Oseaan en Nokoué-meer, waar dit bekend is dat seerowers amok saai.

Hierdie bestemmings is in die Noordwes-Universiteit (NWU) se pluimbalkampioen, Deidre Jordaan, se visier ná ʼn geskiedkundige, hoewel hartbrekende, Statebondspele-veldtog.

Eenduisendagthonderd deelnemers en beamptes. Ses-en-negentig spanne. Een Noordwes-Universiteit (NWU) wat die grootste Spar Netbalkampioenskap ooit aanbied.

Die Fanie du Toit Sportterrein het van 8 tot 13 Augustus behoorlik uit sy nate gebars met netbaltalent, en die NWU het weereens bewys dat daar nie ’n toernooi bo sy vuurmaakplek is nie.

Die topspanne het in die Senior A-afdeling meegeding, sake is in die o.21-kampioenskap uitgespook en ’n menigte spanne het in verskeie subdivisies deelgeneem.

“Die ‘s’ is silent,” verduidelik die pas 20-jarige Anais. “Jy spreek dit uit soos ‘A-ny’.” Om mense reg te help met die uitspraak van haar naam is tweede natuur. “Ek is al gewoond daaraan,” lag sy.

Dit is egter op die skaakbord waar dié oud-leerling van Potchefstroom Gimnasium en nou BCom Toerismebestuur-student by die Noordwes-Universiteit (NWU) die meeste van haar praatwerk doen. Kyk, hier is nou vir jou ʼn skaakfundi as jy nog nooit een gesien het het nie.

Hy is dalk klein van statuur, maar almal weet hy is gróót van gees. Dr Ali Bacher, Suid-Afrika se befaamdste krieketadministrateur, wat op 80-jarige ouderdom steeds wêreldwye aansien geniet, het vandeesweek die Noordwes-Universiteit (NWU) besoek om genoeg lewenslesse en staaltjies te deel om boeke vol te maak.

Hierdie gaslesing is deur die Fakulteit Gesondheidswetenskappe aangebied en deur die Sentrum vir Gesondheid en Menslike Prestasie gereël, en mensig, dit was interessant.

Waar om te begin?

Daar was die afgelope paar jaar nie naastenby genoeg skoolverlaters wat aan die minimum vereistes vir toelating tot tersiêre studiegebiede soos Ingenieurswese, Natuurwetenskappe, Ekonomiese Wetenskappe en Gesondheidswetenskappe voldoen het nie. Só sê Elza Hattingh van die Noordwes-Universiteit se Fakulteit Ingenieurswese wat aan die hoof staan van die fakulteit se Xcel-program – ’n inisiatief wat aan studente ’n tweede kans bied om hulle vorige graad 12 Senior Sertifikaat-eksamenuitslae in Wiskunde en Fisiese Wetenskap te verbeter.

Die Besigheidskool van die Noordwes-Universiteit (NWU) het op Vrouedag vanjaar die voorreg gehad om begaafde en skrander jong leerders en studente te vereer wat die potensiaal toon om ’n beter toekoms vir ons almal te skep!  Die finaliste en wenners van die Modiragatsi-innoveringskompetisie vir die jeug is tydens ’n ontbytgeleentheid by The Capital On The Park Hotel in Sandton vereer.