“Oom Danie!” klink die stem van die jong vrou van oorkant die straat op. Vir ’n oomblik kom alles in die eklektiese Stellenbosch, waar hy rondstap, tot stilstand en Danie Hefer draai om. Hy het nog ’n paar oomblikke tevore rondgekyk op soek na ’n restaurant, onbewus daarvan dat sy rankerige gestalte die aandag getrek het van die vrou wat nou na hom toe hardloop. Sy gooi haar arms om hom en gee hom ’n drukkie. Nadat sy hom weer laat los het, bedank sy hom vir die rol wat hy gespeel het om haar te help om haar graad te kry.

Die Raad van die Noordwes-Universiteit (NWU) het op sy vergadering van 23 Junie 2022 ’n nuwe voorsitter en ondervoorsitter verkies.

Mnr Bert Sorgdrager, ’n gesoute regskundige met meer as 30 jaar ervaring in die privaat sektor, is as die sesde voorsitter van die NWU Raad verkies.  Mnr Obakeng Mongale, ’n ervare staatsamptenaar en die huidige superintendent-generaal vir die Noordwes Departement van Gesondheid, sal as ondervoorsitter dien.

Hy sê nooit vir niks “nee” nie. Ooit. Só beskryf diegene wat Rethabile Dube ken dié 25-jarige baanbreker.

In universiteit-volksmond is hy slegs bekend as Dube. Almal ken Dube. Soos Cher, Prince, Drake en Madonna. As Senior Administratiewe Assistent by Gradeplegtighede en Seremonies aan die Noordwes-Universiteit (NWU) is sy gesig alombekend in Mahikeng, Potchefstroom, Vanderbijlpark en selfs so vêr as Namibië.

Atlete van die Noordwes-Universiteit (NWU) het ’n uitmuntende prestasie gelewer by die Afrika-atletiekkampioenskap van die CAA wat onlangs in St Pierre, Mauritius gehou is. Dit is die derde keer dat Mauritius die gasheer was van die geleentheid nadat die 1992- en 2006-kompetisies ook daar gehou is.

Suid-Afrika het 36 medaljes verower by die byeenkoms, wat van 8 tot 12 Junie gehou is. Dit is die meeste medaljes sedert 1993. Hierdie yslike getal het Suid-Afrika in staat gestel om tweede te eindig, net ná Kenia, hoewel die Keniane net 23 medaljes kon inpalm.

Met elke trappie wat Tebogo tot op die verhoog klim, met elke tree wat hy oor die verhoog gee, het sy ma, Jane Fransman, se hart vinniger begin klop. Doef-doef, doef-doef. Trotse slae. Toe hy tot stilstand kom en dáár, in die ouditorium op die Noordwes-Universiteit (NWU) se Potchefstroomkampus, sy onderwysgraad ontvang, wou sy uit haar vel bars. Die trane het geloop. “Ek was baie bly. Ek het nooit gedink ek sou die dag sien dat hy op die verhoog gaan staan en sy graad kry nie.” Want die lewe het haar al meer as een keer van koers af probeer gooi.

Hulle ken net een pad: vorentoe. Hulle ken net een resultaat: wen. Die Noordwes-Universiteit (NWU) se eerste rugbyspan is op Saterdag 11 Junie in Alberton as die Goue Leeus Rugby Unie se Piratesliga-kampioen gekroon nadat hulle Wits 31–26 verslaan het.

Daar het by tye vraagtekens oor Waldouw Smit se spiesgooiloopbaan gehang. Gaan hy sy beseringspoke kan afskud? Gaan hy sy potensiaal kan bereik? Gaan hy die 80 m-kerf kan oorskry? Die antwoorde is “ja”, “ja” en nogmaals “ja”.

Taal oorbrug grense. Die verbind ons, inspireer ons, voed ons op en verryk ons. Dit is dié fundamentele instrument wat ons in staat stel om mekaar te leer ken. En in ’n uiteenlopende, meertalige samelewing sal daar minder grense tussen ons wees hoe meer ons mekaar se moedertale leer waardeer.

Dit is waarom die Skool vir Taalonderwys in die Fakulteit Opvoedkunde, in samewerking met die Taaldirektoraat, ’n kortleerprogram oor meertalige pedagogieë ontwerp het, wat die personeel van elke fakulteit wil help om ’n mate van meertaligheid in hulle lesings te implementeer.  

Dit is baie bemoedigend dat die jongste baie-beter-as-verwagte syfers van die bruto binnelandse produk (BBP) vir die eerste kwartaal van 2022 ’n verdere sterk herstel in die ekonomie toon ná die ekonomiese terugslae van die Covid-19-inperkings en die wydverspreide onrus van Julie 2021.

Prof Raymond Parsons, ekonoom van die Besigheidskool van die Noordwes-Universiteit (NWU), sê die syfers wat op 7 Junie 2022 aangekondig is, versterk die BBP-groei van 4,9% wat vir 2021 as geheel opgeteken is, ná die negatiewe -6,4%-groei wat die vorige jaar ervaar is.