Die Enterprise African Regional Network (EARN) gaan steeds ’n groot faktor wees om jongmense na die landbousektor te lok, aangesien dit entrepreneurs uit Afrika toerus met die kennis en vaardighede wat vir die voedselproduserende bedryf nodig is. African Greeneurs van EARN het op Maandag 5 Februarie 2024 ’n besoek aan die Fakulteit Ingenieurswese van die Noordwes-Universiteit (NWU) gebring om verdere samewerking oor ingenieursnavorsing in landbou te ondersoek.

Die Suid-Afrikaanse privaat wildjagbedryf is een wat gekoester moet word. Dit is weer eens duidelik gemaak deur navorsing wat uitgevoer is deur die navorsingseenheid vir Toerismenavorsing in Ekonomie, die Omgewing en die Samelewing (TREES), wat deur prof Peet van der Merwe, Andrea Saayman en Elmarie Slabbert uitgevoer is. Die navorsing het getoon dat die bedryf miljarde rand in Suid-Afrika se ekonomie terugploeg.

Die erkenning van lede van die Golden Key-erevereniging is ’n buitengewone viering van briljantheid wat die voortreflikste denkers en talentvolste individue vir hulle onwrikbare bydraes tot die Golden Key-vereniging vereer.

Die tennisbane op die Potchefstroomkampus van die Noordwes-Universiteit (NWU) gaan weer eens gasheer speel vir van die wêreld se top- junior spelers wanneer twee ITF J100-toernooie hulle eerste houe op 26 Februarie op die bane afslaan.

ITF is die akroniem vir die Internasionale Tennisfederasie, wat die beheerliggaam van wêreldtennis is.

Die toernooie, waarvan die laaste een op 8 Maart sal plaasvind, gaan weer eens die NWU se geriewe van wêreldgehalte tentoonstel en beklemtoon waarom die universiteit die voorkeurbestemming vir internasionale atlete en geleenthede is.

Die minibustaxibedryf is – ten spyte van populêre opinie – meer georganiseerd as wat algemeen geglo word.

Die taxibedryf leen homself tot ernstige korrupsie en twyfelagtige wetstoepassingspraktyke, wat die betrokkenes aan ’n baie hoë risiko blootstel.

Die taxibedryf kan wegkom met die verskaffing van substandaard dienste soos swak kliëntediens en die bedryf van onveilige voertuie omdat daar min of geen standaardbedryfsprosedures is waaraan voldoen moet word nie.

’n Gebrek aan ’n bewustheid oor ons vleilande kan katastrofiese gevolge vir Suid-Afrika se biodiversiteit hê. Vleilande speel ’n kritieke rol in die bewaring van biodiversiteit, waterbestuur en die heenkome van gemeenskappe, maar groot landbou-uitbreiding, stedelike ontwikkeling en industriële aktiwiteite beteken dat hierdie noodsaaklike ekostelsels toenemend onder druk is.

Volgens prof Wynand Malherbe van die Waternavorsingsgroep by die Noordwes-Universiteit (NWU), word dringende intervensies vereis om hierdie vernietigende effek te keer.

Navorsing in stralingstegnologie is noodsaaklik vir gevorderde toepassings in die bedryf, om veiligheid te bevorder, doeltreffendheid te verbeter en nuwe tegnologiese innovasies en oplossings moontlik te maak, veral in ’n land soos Suid-Afrika.

Sy naam is Schalk, Schalk Pretorius. En as dit nie vir Schalk Pretorius was nie, was die Noordwes-Universiteit (NWU) ’n tenniskampioen kwyt.

Jare gelede, in die mielieboergemeenskap van Bothaville, besluit ʼn jong Schalk dat hy gaan begin tennis speel. Goed so, sê ma Erika en pa Vickus, tennis sal jy speel. As die een kind speel, sal die ander een ook, en Schalk se driejarige suster Suzanie – nog meer peuter as persoon – word ook ʼn raket in die hand gestop.

Sy is allermins ’n hemelbesem, en op die netbalbaan word sy dikwels deur wolkekrabbers omring. Hart en durf word egter nie in sentimeters gemeet nie, en die Noordwes-Universiteit (NWU) se Martiné Jordaan is ʼn vuurvreter op die baan soos min.

Selfs so dat sy die keurders van die Protea-span se oog gevang het, en van 22 tot 28 Januarie was sy deel van ʼn nasionale oefenkamp in Stellenbosch.

Hier het al haar onverskrokkenheid weer na vore gekom, maar sy sê sy ondergaan ʼn groot gedaanteverwisseling wanneer sy die baan verlaat.

Dit is ’n vlugvoetige dans en balle wat met sierlike boë deur die lug vlieg. Dit is ’n tapisserie van spanwerk, saamgeweef deur drade van meedoënlose aanvalle en rotsvaste verdediging. Netbal is ’n sport soos geen ander nie, en een wat die Noordwes-Universiteit (NWU) bemeester het.