Paulo par excellence
Daar was Woensdagaand 4 Oktober baie min wenkbroue gelig toe Vernon Paulo, die NWU se uithalerhaker, as die NWU Rugbyinstituut se Speler van die Jaar aangewys is.
Paulo is met die Johan Claassen-trofee vir sy uithalerspel in die Varsitybeker beloon en was deurgaans uitsonderlik. Nie net het hy die meeste drieë in die kompetisie gedruk nie – voorwaar ʼn rariteit vir ʼn vaste voorspeler – maar sy werksetiek en leierskap was ook van die vernaamste eienskappe deur die loop van die kompetisie.