Om as regter aangestel te word, is die toppunt van prestasie vir enige regskundige, en die hoogste erkenning van ’n persoon se vermoë en verbintenis tot geregtigheid.  Om as regter in die hoër howe van die land te dien, is ’n gesogte eer wat deur die meeste mense in die regsgemeenskap nagestreef word.   

Dr Neo Morei, die uitvoerende dekaan van die Fakulteit Regte by die Noordwes-Universiteit (NWU), het hierdie gesogte aanstelling as ’n waarnemende regter van mnr Ronald Lamola, die voormalige Minister van Justisie en Korrektiewe Dienste, ontvang. Sy sal hierdie rol vanaf 4 November tot 6 Desember 2024 by die Noordwes-afdeling van die Hoë Hof vervul.   

Sy het haar verrassing en opgewondenheid oor haar aanstelling uitgespreek: “Dit was onverwags om genader te word deur regter Ronald Hendricks van die Noordwes-afdeling van die Hoë Hof, wat my gevra het of ek vir hierdie besonderse geleentheid beskikbaar sal wees.” Sy beskou dit as ’n wonderlike eer, en sê dat “om as regter te dien, was nog altyd ’n doelwit wat ek van die begin van my regsloopbaan gehad het, hoewel my pad my uiteindelik na die akademie gelei het”.

Dr Morei sê dat haar rol as uitvoerende dekaan van die Fakulteit Regte haar gehelp het om vir hierdie posisie oorweeg te word.  “Dit het my in die kollig geplaas. Ek sê altyd dat die NWU instrumenteel was in my reis, en ’n goeie grondslag gelê het vanaf my dae as studente-assistent. Ek het geleidelik deur die range binne die fakulteit gevorder – ek het as junior lektor begin, na lektor en senior lektor gevorder, en toe na departementshoof, direkteur, adjunkdekaan, en nou na uitvoerende dekaan beweeg.  Ek was konsekwent en toegewyd, en het my plek elke tree van die pad verdien. Die NWU het my geleer dat almal onontginde potensiaal het; dit moet net ontsluit word.”  

Dr Morei se boodskap aan die jeug van Suid-Afrika is een van bemoediging: “Hierdie aanstelling bewys dat, ongeag jou agtergrond, alles moontlik is. Ek kom van die dorpie Phokeng, nie ’n groot stad nie, tog het ek sonder huiwering my drome nagejaag. Deursettingsvermoë en nederigheid het my tot hier gebring.”  

Sy sluit af met haar formule vir sukses: Harde werk, fokus, en ’n positiewe ingesteldheid.

Die NWU-familie wens haar geluk en het volle vertroue dat sy hierdie verantwoordelikheid met waardigheid en eer sal volvoer. 

Dr Neo Morei, uitvoerende dekaan van die NWU se Fakulteit Regte.