Dit was so onverwags soos ’n bliksemstraal op ’n sonnige dag. Die Noordwes-Universiteit (NWU) Eagles het ’n paar maande gelede in ’n opwarmingswedstryd teen Wits gespeel.
Die gelukbringerkaptein Ruan "Sampie" Swiegers het die span op die veld gelei. Nadat hy die Eagles se kaptein tydens die 2022 Varsitybeker was, het hierdie vasskopstut sy posisie as die Eagles se de facto-leier gevestig. En toe slaan die noodlot toe. Hy maak sy knie seer.
Met die Varsitybeker om die draai was daar geen tyd om te mors nie – die Eagles het hulle eerste wedstryd op 20 Februarie gespeel – en ’n nuwe leier was nodig.
Namakwaland is droog, yl en, wel, pragtig. In die middel lê die dorp Springbok. In ’n vallei wat deur rotsagtige koepels omring word, lyk dit maklik soos ’n leë belofte. Riaan Genis is op 21 Desember 1999 hier gebore.
Hierdie taai, lenige skrumskakel is as Swiegers se opvolger as kaptein van die Eagles se Varsitybekerspan aangewys en sjoe, kan hierdie terriër vasbyt!
Sy kordaatstukke op die veld is deel van sy spanmaats se drome – en ’n nagmerrie vir sy teenstanders. Die draer van die nommer 9-trui kan – soos alle skrumskakels –op sy beste ’n groot laspos van homself maak as ’n mens dit diplomaties probeer stel. Dit is natuurlik vanuit die oogpunt van die opposisie. Hoe meer ontwrigting hy veroorsaak, hoe meer juig sy broers. Dis iemand wat jy kan volg.
“Dit is ’n groot eer en voorreg om as kaptein aangewys te word. Dit was baie hartseer om vir Sampie te verloor en die nuus van my aanstelling het op die laaste minuut deurgekom, maar ek is baie opgewonde oor die uitdagings wat voorlê. Dit is ’n geweldige verantwoordelikheid, maar ek is reg daarvoor, hoewel ek dit nooit verwag het nie. Ek moes baie hard werk om die leer na bo te klim en dit is my laaste jaar by die NWU, dus wil ek dit die moeite werd maak. Ons het in 2016 laas die Varsitybeker gewen. Dit is hoog tyd dat ons dit weer doen,” sê hierdie matrikulant van die Hoër Jongenskool Paarl in sy kenmerkende Kaapse aksent.
“Ons het die regte span. Ons het genoeg senior spelers. Ons het diepte. “Die sleutel tot sukses in die Varsitybeker is nie die 23 spelers op die dag van die wedstryd nie, dit is die hele groep. Dit gaan oor al 36 spelers in die groep en dit is my werk om hulle almal gemotiveerd te hou. Almal is onmisbaar vir ons saak.”
Genis het in 2022 sy BCom-graad in Ekonomie voltooi en is tans by die NWU Besigheidskool ingeskryf.
“Ek was vir die afgelope drie jaar voltyds met my studies besig. Ek het besluit ek het ’n graad agter my naam nodig; sport is nie alles nie.”
As hy nie agter sy boeke sit of sy boksskoppe oefen nie, geniet hy dit om na die oefenbof te gaan of om tyd by sy vriende deur te bring: “Jy moet soms van die spel af wegkom,” sê hy.
Dan is daar ook ’n sekere dame genaamd Elsje Stofberg sonder wie Riaan se storie nie volledig sou wees nie.
“Ons is nou twee jaar saam. Sy is my steunpilaar met al my rugbyverpligtinge asook met die voltooiing van my graad.” Hy dink na, en sê dan met waardering: “Ek sou niks sonder haar bereik het nie.”
Met Elsje wat van Paarl Gimnasium kom, was hulle tydens die interskole-geleenthede aartsvyande, maar andersins het ’n langdurige vriendskap in iets soveel meer ontwikkel.
“Ons was vyf jaar lank op skool slegs ’n kilometer van mekaar af. Toe, tydens die Covid-tyd, het ons begin gesels … en daarna ’n paar keer saam uitgegaan.”
Elsje is tans ’n onderwyser in Somerset-Wes. Dit is 1 300 kilometer vanwaar Riaan in Potchefstroom gestasioneer is. Dit is ’n afstand wat hy gou sal oorbrug, maar voor dit wag sy groot taak.
Riaan Genis
