Die Rugby-instituut van die Noordwes-Universiteit (NWU) het weer eens bewys dat hulle een van die land se vernaamste voorsieners van spelers is, met nie minder nie as ses spelers van die NWU Eagles-span wat die Varsitybeker gewen het wat nou provinsiale kontrakte losgeslaan het.

Hierdie spelers het ook hulle onderskeie akademiese grade aan die NWU verwerf of is besig om dit te voltooi, en onderstreep dus weer eens die NWU se verbintenis om goed afgeronde atlete te verskaf wat ’n toekoms het wat verder as die sportveld strek.

Hierdie spelers is kaptein Ruan Swiegers (Pumas), Gustav Erlank (Griekwas), Sylvester Hassien (Pumas), Theuns Pretorius (Pumas), Martin Venter (Verona Rugbyklub in Italië), Vernon Paulo (Vrystaat), Tino Swanepoel (Pumas) en Junior White (Pumas).

Die Pumas se afrigter, Jimmy Stonehouse, ’n man bekend vir sy skerpsinnigheid en rugbyvernuf, het seker gemaak dat hy diep in die Rugby-instituut se ruim spelerhulpbronne delf, aangesien hy steeds besig is om ’n rugbydinastie in Nelspruit te bou wat gesorg het dat die Pumas verlede jaar se Curriebeker gewen het en vanjaar tweede in die 2023-kompetisie geëindig het.

Die Rugby-instituut was nog altyd ’n vervoerband van talent vir Suid-Afrika se rugbylandskap, en velde regoor die land het al sedert sy ontstaan in 2000 met spelers van die Rugby-instituut gespog.

“Ek is ongelooflik trots op hierdie spelers, nie net vir die buitengewone diens wat hulle op die veld gelewer het nie, maar ook vir die voorbeeld wat hulle deur hulle akademiese prestasies gestel het. Ek is vol vertroue dat hulle sal voortgaan om hulle loopbane tot nuwe hoogtes te voer,” sê Mervyn Taylor, bestuurder van die Rugby-instituut.

“Hulle het bewys dat met harde werk en toewyding daar geen perke is vir die doelwitte wat ’n mens kan bereik nie. Die Noordwes-Universiteit is trots op julle.”