Die Malawi University of Business and Applied Sciences (MUBAS) het sy University Innovation Pod (UniPod) op sy hoofkampus in Blantyre tydens ’n vrolike en opwindende geleentheid amptelik geopen. Die inhuldiging van UniPod is ’n groot tree vorentoe om, met die borgskap van die Verenigde Nasies se ontwikkelingsprogram (UNDP), innovasie en entrepreneurskap onder Malawiese studente en navorsers te bevorder. Die geleentheid is deur sy edele dr Lazarus McCarthy Chakwere, president van Malawi, bygewoon.
Die visekanselier van MUBAS, prof Nancy Chitera, en verteenwoordigers van verskeie instellings, insluitend die plaaslike verteenwoordiger van die UNDP, Fenella Frost, was ook by hierdie spesiale viering teenwoordig.
’n Hoogtepunt van die gebeurtenis was die toer van UniPod, waar bywoners die geriewe en hulpbronne kon besigtig wat tot studente en navorsers se beskikking is.
Die reis na die bekendstelling van UniPod het begin met ’n besoek in 2022 aan die NWU se Tegnologie-oordrag en Innovasie-ondersteuning-kantoor (TTIS-kantoor) deur ’n Malawiese groep wat Malawi se eerste tegnologie-oordragkantoor by MUBAS wou vestig. Hierdie samewerking het tot die skep van MUBAS se tegnologie-oordragkantoor in UniPod gelei.
Dr Janine Chantson, TTIS se hoofdirekteur, het die UniPod-bekendstelling bygewoon en weer op hoogte gekom met die Malawiese kollegas se vordering sedert hulle in 2022 begin saamwerk het. Verdere geleenthede vir samewerking en die deel van kennis is ook ondersoek.
Vir die NWU en die TTIS-kantoor verteenwoordig die bekendstelling van UniPod meer as net ’n seremoniële geleentheid. Dit is tekenend van ’n versterkte vennootskap wat daarop fokus om innovasie te bevorder en sosio-ekonomiese ontwikkeling in Malawi aan te voer.
Dr Chantson beklemtoon die belangrikheid van samewerkings: “Die TTIS is bly dat ons kon bydra tot die vorming van die prosesse en raamwerke van MUBAS se tegnologie-oordragkantoor. Hierdie samewerking gaan nie net daaroor om saam te werk nie. Dit toon ’n verbintenis tot suid-suid-samewerking en die deel van kundigheid en hulpbronne tot wedersydse voordeel.” Dr Chantson beklemtoon die beduidendheid van sulke vennootskappe en beklemtoon hulle werklike impak om plaaslike innovasie-ekostelsels te verbeter. Sy benadruk ook dat hierdie samewerkingspogings verder as blote samewerking strek, en ’n gedeelde toewyding aan die gebruik van internasionale vennootskappe vir volhoubare ontwikkeling en innovasie omvat.
Die vennootskap tussen die NWU en MUBAS sal in die toekoms as ’n bron van inspirasie dien, en soortgelyke inisiatiewe aanmoedig en bande tussen instellings oor grense heen versterk.
Vir meer inligting oor en hoogtepunte van die geleentheid, besoek:
- YouTube: Official Launch of UniPod at MUBAS
- 247Malawi: Chakwera Presides Over UniPod Launch – Malawi Has Potential for Modern Innovation
Links na regs: Medeprofessor Nancy Chitera, MUBAS se visekanselier; prof Ishmael Kosamu, MUBAS se adjunk-visekansellier; en dr Janine Chantson van die NWU TTIS.
