Die Mahikeng- en Potchefstroomkampus van die Noordwes-Universiteit (NWU) het op die Wêreld Intellektuele Eiendom Dag-vierings op 25 en 26 April 2024 vele aanbiedings gehad. Hierdie jaar se fokus was op hoe intellektuele eiendom kan help dat die Verenigde Nasies se 17 Volhoubare Ontwikkelingsdoelwitte (SDG’s) bereik word, en die gebeurtenisse het studente, navorsers en verteenwoordigers van staatsagentskappe gelok.

In Potchefstroom het twee uitstallings die rol van antieke graansoorte vir die bereiking van geen honger (SDG 2) beklemtoon. Dit het voortgebou op prof Sydney Mavengahama se aanbieding in Mahikeng oor dieselfde onderwerp.

In Potchefstroom was dit prof Jacques Berner, ’n plantfisioloog, en sy studente, Janco Oosthuizen en Zack Meyer, wat eerste aan die woord was. Hulle het lewende voorbeelde van antieke graansoorte vertoon, wat plante en sade ingesluit het. Hulle oorweeg dit om ’n maatskappy te begin wat saad produseer en in antieke graansoorte spesialiseer om die kommersiële produksie van hierdie graansoorte meer algemeen te maak. Antieke graansoorte bied meer gesondheidsvoordele as mielies en is meer aanpasbaar by klimaatsverandering. Prof Berner en sy medewerkers beplan om met voedselproduksiekundiges saam te werk om ’n vraag na hierdie gewasse te skep.

Die tweede uitstaller was Sense Food Product Development, ’n klein sakeonderneming wat in Potchefstroom gestasioneer is. Hulle het verskeie voedselprodukte vertoon wat gemaak is van antieke graansoorte wat met behulp van verskillende produksiemetodes, soos ekstrusie, verkry is. Sense word deur alumni Nadine van der Walt en Mandy van Zyl bedryf en hulle het die waardeketting vir antieke graansoorte voltooi en beklemtoon die potensiaal daarvan in die bedryf.

Dit het deur die aanbiedings en uitstallings op beide kampusse duidelik geword dat antieke graansoorte geweldige groot potensiaal vir die bestryding van honger en die bevordering van voedselsekerheid inhou. Deur lewendige voorbeelde te vertoon en ’n verskeidenheid voedselprodukte te demonstreer, het die uitstallers die veelsydigheid en voedingswaarde van hierdie graansoorte beklemtoon. Die besprekings rondom die produksie van saad en voedselprodukontwikkeling het die belangrikheid onderstreep van samewerking en innovasie om hierdie graansoorte vir die landbou- en voedselbedrywe bekend te maak.

Terwyl ons voortgaan om oplossings vir wêreldwye uitdagings te ondersoek, is dit noodsaaklik om die inisiatiewe te erken en te ondersteun wat die krag van intellektuele eiendom ontgin, sodat ’n volhoubare en hongervrye toekoms vir almal geskep kan word.

Prof Jacques Berner wys vir prof Jeffery Mphahlele, AVK vir Navorsing en Innovasie, lewende voorbeelde van antieke graansoorte, insluitende plante en sade.

Mandy van Zyl en Nadine van der Walt