Die eet van varkvleisprodukte neem toe as gevolg van die bekostigbaarheid, veelsydigheid en hoë proteïeninhoud van die vleis.
’n Noordwes-Universiteit (NWU) navorsingsprojek van die Verbruikerswetenskappe-vakgroep in die Skool vir Toegepaste Gesondheidswetenskappe fokus op aanduidings rakende voedselprodukte (sensoriese en niesensoriese eienskappe) wat verbruikers se voedselkeuses beïnvloed. Prof Annchen Mielmann kyk nou ook na die aanduidings oor varkvleis omdat dit al hoe gewilder onder verbruikers raak.
Sy en haar kollega, Carike Brits, is die medestudieleiers van die meestersgraadstudent Diewald Jordaan, wat spesifiek ondersoek watter intrinsieke en ekstrinsieke produkaanduidings verbruikers oor die waargenome waarde van varkvleis beïnvloed.
“As gevolg van die groter vraag na varkvleis, raak verbruikers al hoe meer besorg oor die gehalte, veiligheid en omgewingsimpak van hierdie vleis. Varkvleis het talle produkaanduidings wat verbruikers se waargenome waarde kan beïnvloed en wat ’n bydraende faktor is ten opsigte van verbruikers se keuse van varkvleisprodukte,” sê prof Mielmann.
Sy sê hulle kwantitatiewe en eties goedgekeurde studie het ’n aanlyn vraelys gebruik om data in te samel.
Die studiebevindings het aangedui dat die meeste van die respondente op ’n weeklikse basis varkvleis eet en meer as 75% het varkvleis as positief beskou.
“Interessant genoeg is die belangrikste redes vir die koop van varkvleisprodukte die verskeidenheid produkte wat beskikbaar is, die vleis se sensoriese eienskappe en die bekostigbaarheid vergeleke met ander rooivleisprodukte.”
Geur, smaak en bekostigbaarheid
Volgens prof Mielmann het Diewald ’n totaal van 17 intrinsieke aanduidings (met ander woorde sensoriese eienskappe soos reuk, smaak en voorkoms) en 26 ekstrinsieke aanduidings (met ander woorde niefisiese eienskappe soos prys en gehalte) geïdentifiseer.
Hy wys daarop dat hoewel respondente die geur en smaak van varkvleis as die belangrikste intrinsieke aanduidings beskou, die prys en gehalte van varkvleis as die belangrikste ekstrinsieke aanduidings beskou is.
Betekenisvolle assosiasies is ook aangedui tussen sosiodemografiese faktore en produkaanduidings, en tussen die waarde wat respondente waargeneem het en aanduidings oor varkvleis.
“Hierdie studie beklemtoon die belangrikheid van sensoriese eienskappe wat verbruikers se waargenome waarde oor varkvleis vorm, aangesien respondente intrinsieke aanduiders as belangriker as ekstrinsieke aanduiders geëvalueer het.”
Studie kan die varkvleisbedryf help om hierdie vleis te bevorder
Die navorsingspan glo dat produkaanduidings in hierdie studie die Suid-Afrikaanse varkvleisbedryf moontlik kan help om die voedingswaarde van varkvleis en unieke produkaanduidings te bevorder en tot ’n beter evaluering van gehalte en ’n meer optimistiese waargenome waarde van varkvleisprodukte kan bydra.
“Hierdie studie kan die verbruiker ook bevoordeel deurdat daar aan hulle verbruiksvereistes voldoen sal word, wat die stand en groei van die Suid-Afrikaanse varkvleisbedryf sal ondersteun.”
Prof Mielmann sluit af deur te sê dat sensoriese eienskappe van voedsel ’n fundamentele rol speel in die verband tussen verbruikersgedrag, voeding en voedselwetenskap om die toenemende vraag na bekostigbare, proteïenryke produkte in stand te hou wat die dieetkundige welstand van verbruikers sal verbeter.
Prof Annchen Mielmann
Carike Brits
Diewald Jordaan
