Die Noordwes-Universiteit (NWU) en Noordwes se provinsiale regering (NWP) gaan saamwerk om probleme in die provinsie te hanteer. Hulle het op 29 April ’n memorandum van verstandhouding (MvV) onderteken wat hulle in staat stel om aan ’n groot hoeveelheid dringende uitdagings met mekaar saam te werk.
Prof Bismark Tyobeka, NWU se hoof en visekanselier, en premier Lazarus Mokgosi het die MvV onderteken en uiteenlopende gebiede van wedersydse belang gedek om ’n raamwerk vir samewerking te verskaf. Hierdie ooreenkoms is vir ’n tydperk van vyf jaar geldig en sal ná drie jaar hersien word om die sukses daarvan te bepaal en om enige uitdagings ten opsigte van die implementering daarvan te hanteer.
“Kwessies van infrastruktuur, energie, en inligting- en kommunikasietegnologie staan sentraal in die ontwikkeling van ’n gemeenskap,” het prof Tyobeka by die ondertekeningseremonie gesê. “Dit gebeur selde dat ’n mens ’n byeenkoms bywoon waar onderwerpe soos kunsmatige intelligensie en regverdige energie-oordrag nie op een of ander manier na vore kom nie.” Hy het gesê dat dit van die gebiede is waar samewerking noodsaaklik is.
Die mag van ’n gemeenskaplike doel
Prof Tyobeka het verwys na die stigting van die Desmond Tutu School of Medicine as ’n skitterende voorbeeld van wat moontlik is wanneer twee partye ’n gemeenskaplike doel het.
“Ek het tydens my inhuldiging as visekanselier gesê dat een van my vernaamste doelwitte is om te verseker dat daar ’n noue werksverhouding tussen die universiteit, die provinsiale regering en munisipaliteite is. Ons het ’n besondere plig om by ons eie mense te begin, en hoewel ons op talle maniere ons doel bereik het om ’n universiteit vir Noordwes te wees, is dit nou tyd om iets tasbaars te doen.”
Die universiteit het talle projekte en inisiatiewe wat sy verbintenis demonstreer om met die provinsiale regering saam te werk en ’n paar opwindende nuwe projekte lê op die horison, het hy gesê. In die pyplyn is die beoogde Skool vir Mynbou en Myningenieurswese in Rustenburg en die Skool vir Veeartsenykunde vir Mahikeng.
Premier Mokgosi het daarop gewys dat ná meer as 30 jaar van demokratiese vryheid, en ten spyte van pogings deur die regering, ’n nuwe vlaag uitdagings na vore gekom het waar die akademie ’n positiewe en belangrike bydrae kan lewer.
“Die universiteit het ’n sentrale rol om te speel in die wyse waarop ons die sosio-ekonomiese vooruitsigte van ons provinsie visualiseer. Sonder die hoë vlak van wetenskaplike, tegniese en breë intellektuele kundigheid wat die NWU het om te bied, sal ons nie in staat wees om die doelwitte te bereik wat in ons sogenaamde mediumtermynontwikkelingsplan uiteengesit word nie, veral as ons volhoubare gemeenskappe wil skep.”
Hy het gewys op die uitdagings soos die geweldige hoë vlakke van armoede en werkloosheid, vloede wat aan klimaatsverandering toegeskryf word en wat die infrastruktuur en landbou in die provinsie skaad, asook die handelsoorloë wat mynmaatskappye se besteding aan hulle maatskaplike en arbeidsplanne en korporatiewe maatskaplike belegging negatief raak.
“In die lig van die enormiteit van hierdie uitdagings, is navorsing en innovasie van die uiterste belang, veral in die formulering van beleid,” het die premier gesê. “Ek glo dat samewerking op gebiede soos landbou-ontwikkeling, water en sanitasie, gesondheid, kunsmatige intelligensie en sport ons volle potensiaal kan ontsluit om die groei en ontwikkeling van ons provinsie moontlik te maak.”
Die NWU en die NWP het op die volgende gebiede van samewerking ooreengekom:
o Navorsing, wetenskap, ontwikkeling en innovasie
o Onderwys, leer- en opleidingsontwikkelingsgeleenthede
o Projekte vir die verligting van armoede
o Landbou-ontwikkeling
o Mynbou en energie
o Water en sanitasie
o Toerisme
o Finansiële dienste
o Logistiek
o Kunsmatige intelligensie
o Kreatiewe bedrywe
o Menslike sekuriteit (insluitende energie- en voedselsekerheid)
o Ingenieurswese
o Gesondheid
o Sport
o Werkskepping en ekonomiese ontwikkeling
o Organisatoriese en institusionele kapasiteitsbou
o Inheemse kennisstelsels
o Verdediging
o Wetenskap en tegnologie
o Enige ander gebiede wat die partye van tyd tot tyd kan identifiseer en op ooreenkom
Volgens die MvV wil die NWP prioriteitsprojekte vir implementering identifiseer en ’n gunstige omgewing vir samewerking met die universiteit verskaf. Op sy beurt sal die NWU die relevante kundigheid verskaf en met die NWP saamwerk om die projekte te implementeer. Die kantore van die visekanselier en die premier sal die onderskeie koördineringsagente wees.
Die partye sal ’n gesamentlike projekbestuurskantoor met gesamentlike verantwoordelikhede op die been bring. Daar sal op ’n projek-vir-projek-basis oor geleenthede vir samewerking ooreengekom word.
Prof Bismark Tyobeka, hoof en visekanselier, en premier Lazarus Mokgosi tydens die ondertekening van die MvV.
