Ruan “Sampie” Swiegers, die voormalige kaptein van die 2023 FNB Varsitybeker-kampioene, die Noordwes-Universiteit (NWU) Eagles, neem ons op ’n herinneringsreis. “Soveel herinneringe kom na vore wanneer ek aan die sewe jaar dink wat ek aan die NWU gestudeer het. Ek ken elke hoekie van Potchefstroom – die goeie en die slegte,” sê Ruan. Benewens dat hy lekker op die lewendige Potchefstroomkampus rondgeloop het, of ’n braai saam met vriende by die koshuis geniet het, sê Ruan dat hy vir altyd sal onthou hoe hy die NWU op die rugbyveld verteenwoordig het.
Die gegradueerde in Menslike Bewegingskunde en Sielkunde, wat ook sy Diploma in Besigheidsbestuur voltooi het, sê dat hy nie enige provinsiale skolerugby gespeel het voordat hy by die Eagles aangesluit het nie. Sampie se wonderlike reis het begin toe hy vir sy destydse koshuis, Laureus Manskoshuis, aan die eerstejaars se rugbytoernooi deelgeneem het. In 2020 het Ruan aan sy eerste Varsitybeker deelgeneem en is as kaptein benoem, en in 2023 het hy die Eagles tot ’n oorwinning in die Varsitybeker gelei toe hulle die UK Ikeys op Maandag 17 April by die Fanie du Toit Sportterrein met 27-25 geklop het.
“Die Varsitybeker-oorwinning in 2023, wat ek met die wêreld se beste spanmaats gedeel het, is waarskynlik my grootste prestasie. Sonder hulle sou die oorwinning nie moontlik gewees het nie,” sê Ruan.
Swiegers het ’n groot prestasie behaal toe hy verhuis het na die landstreek waar die son opkom en waar hy by die Pumas aangesluit het, nadat hy deur die range beweeg het en sy passie vir die spel getoon het. Ruan het gevind dat die skuif van Varsitybeker- en koshuisrugby na professionele rugby nie so uitdagend was as wat ’n mens sou verwag nie.
“Die wêreldklasgeriewe by die NWU, saam met die wonderlike afrigters, het dinge vir my makliker gemaak om by die professionele vlak van rugby aan te pas. Ek is waar ek vandag is as gevolg van my harde werk en ek sit baie ekstra sessies in om aan die vereistes te voldoen wat die unie vir my gestel het. Dit help my op by die professionele vlak van die spel by te hou,” sê hy.
Hy verduidelik dat sy persoonlike doelwitte vir die seisoen is om fiks en gereed te wees wanneer hy ook al gekies word, en om in elke wedstryd beter te speel. “Ek wil die beste wees wat ek kan en die span op elke moontlike manier dien. Ek wil ’n goeie spanmaat wees, maar – die heel belangrikste – ek wil ’n goeie vriend vir diegene rondom my wees,” voeg hy by.
Die 2024 FNB Varsitybeker het sy halfpadmerk bereik en Ruan glo dat die Eagles hulle titel sal kan verdedig. Hy raai die manne aan om vertroue in hulleself te hê en elke oomblik van hulle reis te geniet. “Glo in die ou langs jou, glo in die afrigters, glo in die stelsel en bo alles los alles daar op die veld.”
“Toekomstige rugbysterre moet nooit hulle doelwitte uit die oog verloor nie. Hulle moet ’n goeie balans handhaaf tussen sport en om die lewe te geniet, en nooit ophou om in hulleself te glo nie,” sluit Ruan af.
Ruan “Sampie” Swiegers,
