Die algemeen verwagte draaipunt vir die Monetêre Beleidskomitee (MBK) om nou te begin om sy rentekoersverlagingsiklus met ’n geringe 25 basispunte (bps) aan die gang te kry, is goeie nuus vir besighede en verbruikers.

In sy kommentaar oor die besluit deur die Suid-Afrikaanse Reserwebank (SARB) op 19 September sê prof Raymond Parsons, ekonoom van die Noordwes-Universiteit (NWU) se Besigheidskool, dat, hoewel die besluit marginaal bly met betrekking tot die huidige hoë leenkoste, verteenwoordig dit nietemin ’n positiewe draaipunt in die rentekoersvooruitsigte.

 “Monetêre beleid is steeds in ’n beperkende omgewing, maar die SARB het nou besef dat die tyd ryp is vir rentekoersbeleid om by ’n grootliks beter inflasievooruitsig te begin aanpas.”

Prof Parsons sê die tydsberekening en tempo van verdere rentekoersverlagings deur die MBK sal natuurlik deur data aangedryf word, maar sal waarskynlik nou voortgaan as die inflasievooruitsig verder verbeter.

 “Hoewel die MBK-verklarings eksterne onsekerhede beklemtoon het, dui wêreldwye en plaaslike ekonomiese tendense oor die algemeen sterk daarop dat, skokke uitgesluit, ’n verdere 25 bps-verlaging met die MBK se volgende vergadering in November moontlik behoort te wees.”

Prof Parsons sê dit is nog vroeg in die implementering van die tweepot-stelsel van toegang tot pensioenfondse en, gegee die streng reëls wat voorgeskryf word, is die MBK reg om nie té bekommerd oor die moontlike uitwerking daarvan op inflasie te wees nie.

 “Op grond van huidige bewyse sal die makro-ekonomiese implikasies van die tweepot-stelsel waarskynlik heel gebalanseerd wees, met ander woorde ’n ‘Gouelokkies-impak’ – nie te warm nie, nie te koud nie.”

Volgens prof Parsons was daar ook in die MBK-verklaring belangrike verwysings na geadministreerde pryse oor die algemeen en Eskom-tariewe in die besonder wat voortgaan om groeirisiko’s vir die inflasievooruitsig in te hou.

 “Eskom vra vir prysverhogings van 36%, 12% en 9% onderskeidelik oor die volgende drie jaar.”

Prof Parsons sê dat daar gelukkig nou ’n sameloop van druk van die Minister vir Elektrisiteit, die parlement, die Presidensiële Klimaatskommissie en ander belangrike belanghebbers vir die hervorming van elektrisiteitspryse is voordat enige finale besluite geneem word.

 “Laastens erken die MBK-verklaring dat Suid-Afrika se ekonomiese groei al vir té lank te laag is. Die MBK het ook erken dat ’n belangrike swak skakel in Suid-Afrika se groeivooruitsigte totale bruto vastekapitaalvorming (BVKV) is, wat vir vier agtereenvolgende kwartale gedaal het.”

Hy sluit af dat, benewens strukturele remedies en hervormings, sterker BVKV egter ook progressiewe verlaging van leenkoste van kapitaal nodig het om die risiko-beloning-verhouding van privaat beleggingsplanne, veral vir KMMO's, te help verbeter.