Die teleurstellende groeisyfer van 0,1% van die bruto binnelandse produk (BBP) vir die eerste kwartaal van 2025, wat op 3 Junie deur StasSA vrygestel is, het as geen verrassing gekom nie, aangesien dit bloot verskeie maande van gedempte hoëfrekwensie- ekonomiese data bevestig wat op hierdie waarskynlike uitkoms gedui het.
Prof Raymond Parsons, ekonoom van die Noordwes-Universiteit (NWU) se Besigheidskool, sê hoewel negatiewe wêreldwye verwikkelinge vroeër hierdie jaar ook ’n rol gespeel het, die swakker ekonomiese data reeds voor dit duidelik waargeneem is.
“Die Absa Purchasing Managers’ Index vir Mei het byvoorbeeld sewe agtereenvolgende maande ’n inkrimpingsfase beleef, ten spyte daarvan dat dit onlangs tekens van besigheidsaktiwiteit en’n verbetering in vraag getoon het. Die vernaamste vervaardigingsektor gaan waarskynlik vir eers traag bly. Hierdie werklikheid is ook onlangs deur verskeie voorspellings van verlaagde groei vir 2025 aangedui, insluitende deur die Nasionale Tesourie (1,9% tot 1,4%) en die Suid-Afrikaanse Reserwebank (SARB) (1,7% tot 1,2%).”
Prof Parsons verduidelik dat indien die huidige tendense voortduur, die groeivooruitsig vir hierdie jaar nou waarskynlik slegs 1% gaan wees, en dalk in 2026 tot 1,5% kan styg.
Hy sê dit is duidelik dat die verwagte ekonomiese herstel in Suid-Afrika tans sukkel om momentum te verkry en maksimum ondersteuning nodig het om die opswaai van die besigheidsiklus te versterk.
“Die jongste groeisyfers het dus ’n hernude dringendheid gebring vir die behoefte om Suid-Afrika se groeistrategie om te keer op wyses wat beter groeivooruitsigte moontlik maak. Bruto vastekapitaalvorming was ook negatief. Die swak prestasie van vastekapitaalbelegging as ’n sleutelaandrywer vir groei lyk baie negatief, aangesien kapitaalbelegging die noodsaaklikste element vir die groeikoers is.”
Volgens prof Parsons beklemtoon dit ook die belangrikheid daarvan om die grootskaalse besteding aan infrastruktuur te bespoedig, waartoe die amptelike beleid reeds verbind is. “Versnelde strukturele hervormings bly die beste manier om die algehele mikpunt van 3%-groei van die Regering van Nasionale Eenheid oor die medium termyn te bereik, asook om eksterne teenwinde te hanteer,” sluit hy af.
