’n Sportsigprogram kan visuele en motoriese vaardighede by jong netbalspelers beduidend verbeter. Dit is volgens die navorsingsbevindings van prof Dané Coetzee van die Skool vir Biokinetika, Rekreasie en Sportwetenskap aan die Noordwes-Universiteit (NWU) en haar navorsingsvennoot, dr Elna van der Merwe.

Hulle navorsingsartikel getiteld “An exploratory investigation of the effect of a sports vision programme on Grade 4 and 5 female netball players’ visual skills”, is in die International Journal of Environmental Research and Public Health gepubliseer.

Hulle doel was om vas te stel of gestruktureerde sportsigopleiding visuele en motoriese vaardighede kan bevorder wat van kritieke belang is vir spelers se prestasie op die baan, veral hand-oog-koördinasie en reaksietyd.

Hou jou oog op die bal

Die belangrikheid van visuele vaardighede in sport vir niegestremdes word wyd erken. Sig speel ’n noodsaaklike rol in die verwerking van omgewingsinligting, en dit is noodsaaklik vir atlete om goeie visuele en perseptuele vaardighede te ontwikkel om optimale prestasie te behaal.

Ten spyte van talle studies wat die voordele van sportsigprogramme vir elite-atlete beklemtoon, is daar ’n gebrek aan navorsing wat fokus op die manier waarop sulke programme jonger atlete beïnvloed. Prof Coetzee en dr Van der Merwe wou hierdie gaping oorbrug deur die impak te evalueer van ’n agt weke lange sportsigprogram op die visuele vaardighede van graad 4- en 5-netbalspelers.

Hoe hulle dit gedoen het

Die studie is as ’n voortoets- en nátoets-eksperiment ontwerp en het 25 deelnemers met ’n gemiddelde ouderdom van 10,08 jaar betrek.

Die deelnemers is in twee groepe verdeel: ’n eksperimentele groep (13 deelnemers) wat sportsigopleiding ondergaan het, en ’n kontrolegroep (12 deelnemers) wat geen intervensie ontvang het nie. Die opleidingsessies vir die eksperimentele groep is twee keer per week vir agt weke lank uitgevoer, met elke sessie wat 60 minute geduur het.
Om die impak van die sportsigprogram te meet, het die navorsers verskeie gevestigde toetse gebruik om verskillende visuele en motoriese vaardighede vas te stel, insluitende hand-oog-koördinasie, reaksietyd, perifere visie en sakkadiese oogbewegings.

Albei groepe is voor en ná die program geëvalueer, en ’n retensietoets is twee maande later gedoen om vas te stel of die intervensie enige blywende effek gehad het.

Wat die navorsers bevind het

Aan die begin van die studie was daar geen statisties beduidende verskille tussen die eksperimentele en kontrolegroepe ten opsigte van hulle visuele vaardighede nie. Nadat die sportsigprogram voltooi is, het die eksperimentele groep egter ’n beduidende verbetering in sleutelareas getoon.

Hand-oog-koördinasie en reaksietyd, twee kritieke komponente in netbalprestasie, het in die besonder ’n beduidende verbetering getoon by die eksperimentele groep, vergeleke met die kontrolegroep. Beduidende verbetering is ook in motoriese koördinasie, visuele nasporing en reaksiespoed waargeneem.

Daarbenewens is hierdie verbeterings met verloop van tyd behou, soos gedemonstreer is deur die retensietoets wat twee maande ná die intervensie gedoen is. Die kontrolegroep, wat nie die sportsigopleiding ontvang het nie, het deur die verloop van die studie ’n afname in reaksietyd getoon, wat die voordele van die program verder beklemtoon het.

’n Visie vir die pad vorentoe

Hierdie verkennende ondersoek verskaf goeie bewyse dat ’n sportsigprogram visuele en motoriese vaardighede by jong netbalspelers beduidend kan verbeter. Die program se blywende effek, wat deur die retensietoets gedemonstreer is, het verder beklemtoon dat die program die potensiaal het om langtermyn-sportprestasie te bevorder.

Hoewel die studie deur die klein steekproef beperk is, bied die bevindings waardevolle insigte in die rol van sigafrigting in die sportontwikkeling van kinders.

Prof Coetzee en dr Van der Merwe sê dat toekomstige navorsing op groter steekproewe moet fokus en moet ondersoek hoe sportsigopleiding vir verskillende sportsoorte en ouderdomsgroepe aangepas kan word. Hulle redeneer ook dat dit voordelig sal wees om die direkte impak van verbeterde visuele vaardighede op prestasie op die veld te ondersoek om die doeltreffendheid van hierdie programme verder te bekragtig.

Prof Dané Coetzee