In ’n groot oomblik vir die NWU en wêreldwye diensleer het Beatrix “Bibi” Bouwman, direkteur vir volhoubaarheid en gemeenskapsimpak (SCI), Sy Heiligheid Pous Franciskus op 9 November 2024 tydens die V Global UNISERVITATE Symposium in die Vatikaanstad ontmoet. Hierdie ontmoeting is ’n betekenisvolle mylpaal in die NWU se vennootskap met UNISERVITATE, ’n wêreldwye netwerk wat gemeenskapsbetrokkenheid in hoëronderwysinstellings bevorder.

UNISERVITATE, ’n internasionale inisiatief wat verbind is tot die institusionalisering van diensleer in Katolieke hoëronderwysinstellings deel kernbeginsels met die NWU se missie vir SCI. UNISERVITATE, wat gegrond is op samewerking, respek vir diversiteit en gesamentlike skepping, bevorder holistiese opvoeding wat akademiese uitnemendheid met etiese waardes kombineer – waardes wat diep in die NWU se onderrigstrategieë en beleide oor gemeenskapsbetrokkenheid vasgelê is.

“By die NWU glo ons dat opvoeding wat verder as die klaskamer strek ’n gevoel van maatskaplike verantwoordelikheid en etiese leierskap onderskryf,” sê Bibi. “Ons samewerking met UNISERVITATE weerspieël hierdie verbintenis.”

Bibi is sedert 2019 ’n sleutelfiguur in UNISERVITATE se akademiese klankbord en benut haar ervaring as die voormalige voorsitter van die Suid-Afrikaanse gemeenskapsbetrokkenheidsforum vir hoër onderwys (Higher Education Community Engagement Forum, SAHECEF). Sy verteenwoordig die Afrika-kernpunt by Tangaza Universiteit in Nairobi en verskaf strategiese leierskap om diensleerinisiatiewe regoor die vasteland te bevorder. “Die doel van die projek is om kernpunte te bou waar betekenisvolle gemeenskapsdiens kan floreer en wêreldwyd ’n volhoubare impak kan skep,” verduidelik Bibi.

Die V UNISERVITATE Symposium, wat deur LUMSA Universiteit aangebied is, het in ’n oudiënsie met Pous Franciskus geëindig. Die tweedag-geleentheid het besprekings ingesluit oor die institusionalisering van solidariteit-diensleer, met werkswinkels en voltallige sittings om die raakpunte met die Global Compact on Education en die Volhoubare Ontwikkelingsdoelwitte te ondersoek. Bibi was die mede-aanbieder van ’n werkswinkel oor “Changing of the Heart and Mind”, ’n konsep wat sentraal is tot die transformatiewe benadering van SSL.

Tydens die oudiënsie het Bibi vir Pous Franciskus ’n spesiale geskenk oorhandig: ’n stel van die NWU se beroemde penne wat deur prof Louis du Preez van die Eenheid vir Omgewingswetenskappe en -bestuur geskep is. “Die penne, wat van purperharthout (Peltogyne paniculata) gemaak is, word pers wanneer dit aan sonlig blootgestel word. Hierdie hout, wat inheems is in Suid-Amerika – die pous se tuisland – simboliseer ons respek en verbintenis,” verduidelik sy. Die penne is in ’n gegraveerde kissie oorhandig – ’n bewys van die NWU se diepe bewondering en welwillendheid.

“Ons het mekaar met die hand gegroet en ek het ons hoogste agting en goeie wense namens die NWU oorgedra,” het Bibi gesê. Hierdie persoonlike ontmoeting het ’n blywende indruk gemaak, en die gedeelde verbintenis versterk tot opvoeding wat grense oorskry.

Die samewerking tussen die NWU en UNISERVITATE het die universele mag van diensleer beklemtoon om empatie, leierskap en gemeenskapsbetrokkenheid te kweek. Ten spyte daarvan dat Suid-Afrika geen Katolieke universiteite het nie, het die betrokkenheid van die NWU hulle verbintenis tot wêreldwye dialoog en volhoubare impak onderstreep. “Hierdie vennootskap gee erkenning aan die NWU se kundigheid en versterk ons benadering tot betekenisvolle gemeenskapsbetrokkenheid,” sê Bibi.

Die ontmoeting met Pous Franciskus was meer as bloot ’n seremoniële geleentheid – dit het ’n gedeelde verbintenis gesimboliseer tot opvoeding wat lewens verander. Vir Bibi en die NWU was dit ’n geleentheid om Suid-Afrika se bydrae tot wêreldwye diensleer te toon en om inspirasie by een van die wêreld se invloedrykste morele leiers te verkry.

Toe die simposium afgesluit het, was die boodskap duidelik: opvoeding gaan nie net oor kennis nie, maar oor die voorbereiding van harte en gedagtes wat gereed is om ’n beter wêreld te dien. Vir die NWU en sy wêreldvennote het die reis na ’n meer deernisvolle en regverdige samelewing ’n beduidende tree vorentoe gegee.

Bibi Bouwman en Sy Heiligheid Pous Franciskus. Sy het ’n spesiale geskenk aan die pous oorhandig.
Credito: ©2024 Servicio Fotografico Vaticano

’n Spesiale geskenk aan Pous Franciskus: ’n stel van die NWU se beroemde penne, wat deur prof Louis du Preez van die Eenheid vir Omgewingswetenskappe en -bestuur geskep is.

Die penne, wat van purperharthout (Peltogyne paniculata) gemaak is, word pers wanneer dit aan sonlig blootgestel word.

Akademiese klankbordlede wat teenwoordig was: Andrew Furco, Leticia López Villareal, Daniela Gargantini, Beatrix Bouwman, Arantzazu Martinez Odria, en Bojana Culum.

Afrika-kernpuntleiers en rektors van Katolieke universiteite in Afrika.