NWU-navorsers ontvang R9 miljoen om hartsiektes in Afrika te bestudeer

Marelize Santana -- Tue, 06/20/2017 - 10:54

NWU-navorsers ontvang R9 miljoen om hartsiektes in Afrika te bestudeer

Nie-oordraagbare of leefstylsiektes sal teen 2030 die algemeenste oorsaak van sterftes in Afrika wees, sê die Wêreldgesondheidsorganisasie (WGO). Navorsers van die Noordwes-Universiteit (NWU) is midde in ’n nuwe openbare-privaat samewerkingsprojek ter waarde van R80 miljoen om Suid-Afrika se mediese navorsingsvermoëns ’n hupstoot te gee.

Die universiteit se navorsers het R9 miljoen se befondsing ontvang deur hierdie gesamentlike inisiatief tussen die Suid-Afrikaanse Mediese Navorsingsraad, GlaxoSmithKline en die Newton Fund via die VK se mediese navorsingsraad. Die geld sal gebruik word vir navorsing oor kardiovaskulêre siektes, wat in Afrika aan die toeneem is, en ook oor hipertensie. Volgens prof Alta Schutte, direkteur van die Mediese Navorsingsraad se Eenheid vir Hipertensie en Kardiovaskulêre Siektes aan die NWU, word daar geglo dat dit verband hou met ’n kombinasie van faktore soos snelle verstedeliking, abnormale natriumhantering, verhoogde vaskulêre weerstand en arteriële styfheid.

Die breër program sal ook op navorsing oor die behandeling van kanker, diabetes en niersiektes fokus.

Siektelas vereis wêreldwye reaksie
Dr Mark Palmer, direkteur van internasionale strategie van die VK se mediese navorsingsraad, sê dat nie-oordraagbare siektes (NOS’e) 38 miljoen mense per jaar se dood veroorsaak, en feitlik 75% van hierdie sterftes kom in lae-inkomste- en middelinkomstelande voor. “Dit is duidelik dat die hantering van die las van NOS’e regoor die wêreld ’n wêreldwye reaksie vereis,” sê hy. “Hierdie opwindende samewerking tussen GlaxoSmithKline en uitstekende akademiese wetenskaplikes van die VK en Suid-Afrika verteenwoordig ’n deel van die mediese navorsingsraad se internasionale pogings om kundigheid en hulpbronne bymekaar te voeg om navorsing te lewer wat ’n ware verskil in die hantering van hierdie siektes sal maak."

In Suid-Afrika het NOS’e nou die belangrikste groep oorsake geword wat tot sterftes lei, en is verantwoordelik vir ongeveer 40% van die totale sterftes en een uit drie sterftes voor die ouderdom van 60 jaar, sê professor Glenda Gray, voorsitter en HUB van die SAMNR. “Ons ammunisie in hierdie stryd is ons mediese navorsing.”

Die NWU se prof Alta Schutte brei uit op die probleem in Suid-Afrika: “Die gebrek aan bewustheid, gereelde onderdiagnoses en ondoeltreffende behandeling van hipertensie oor die algemeen, maar veral by Afrikane, lei tot ernstige komplikasies soos beroerte, hart- en niersiektes. In ons studie wil ons vroeë merkers of voorspellers vir die ontwikkeling van kardiovaskulêre siektes by swart Suid-Afrikaners identifiseer.

“Slegs deur sulke merkers as potensiële siftingsaanwysers, voorspellers of teikens vir intervensie te identifiseer, sal ons suksesvolle intervensieprogramme onder Afrikane op jonger ouderdomme kan implementeer.”


Prof Alta Schutte, direkteur van die Mediese Navorsingsraad se Eenheid vir Hipertensie en Kardiovaskulêre Siektes aan die NWU.