NWU is ʼn baanbreker in Afrika

Belinda Bantham -- Wed, 05/30/2018 - 15:44

NWU is ʼn baanbreker in Afrika

Die Noordwes-Universiteit (NWU) is een van die baanbrekers in navorsing oor voeding in Afrika. Die leidende rol wat die NWU se Sentrum van Uitnemendheid vir Voeding (CEN), in die samewerking met die Universiteit van Ghana (UG) en die Nutricia-navorsingstigting (NNS) speel, getuig daarvan.

Die tweede fase van hierdie samewerking om voedingsnavorsingkapasiteit in Afrika te vestig en verder te versterk, het pas begin.

Dr Robin Dolman, die projekleier by CEN, sê die eerste fase van die samewerking het in 2014 begin met die befondsing van vyf beurse vir meestersgraadstudente – drie van Ghana en twee van Suid-Afrika. Die eerste fase het ook ’n personeeluitruilingsprogram vir akademici in Ghana wat met hulle PhD’s besig is, ingesluit.

”Die sukses van die eerste fase het ons in staat gestel omsuksesvol vir befondsing ten bedrae van ’n miljoen euro vir die tweede fase – wat oor die volgende vier jaar sal strek – aansoek te doen,” sê dr Dolman.

Prof Johann Jerling, me Cornelia Conradie, prof Edelweiss Wentzel-VIljoen en me Marlize Korff speel ’n integrale rol in hierdie inisiatief.

“Ons voorsien dat CEN sal voortgaan om personeel van die UG te ondersteun en toe te rus sodat hulle weer op hul beurt dieselfde ondersteuning aan omliggende lande kan verskaf,” sê dr Dolman. “Die NWU sal op lande wat rondom Suid-Afrika geleë is fokus, en dit sal die twee universiteite in staat sal stel om as voedingsnavorsingskerns in Afrika te funksioneer.”

Sy sê dat CEN en die UG hulle kundigheid en hulpbronne met mekaar sal deel, saam kursusse sal aanbied en materiaal sal verskaf wat gebruik kan word om nagraadse studente en voedingskundiges in ander Afrika-lande toe te rus en te bemagtig.

“Met hierdie befondsing kan ons 22 beurse vir meestersgraadstudies verskaf. Die UG sal op studente van omliggende lande soos Liberië en Sierra Leone fokus, en die NWU sal op studente van Suid-Afrika en ander lande soos Botswana en Malawi fokus.

“Die tweede fase sal ook ’n halfjaarlikse geformaliseerde PhD-ondersteuningsprogram vir 20 PhD-studente van regoor Afrika insluit,” sê dr Dolman. “Hulle sal ’n drie week lange gestruktureerde program by die NWU bywoon, waar opleiding verskaf sal word in ’n aantal kern- metodologiese vakke wat vir elke PhD-student onontbeerlik is. Die doel van hierdie program is om leiding en mentorskap te verskaf – nie net om hulle PhD’s te kry nie, maar ook om loopbane as navorsers in voeding te bou.”

Dr Dolman sê die geslaagde personeeluitruilingsprogram sal tydens die tweede fase van die program voortgaan, omdat dit ’n belangrike rol in die ondersteuning en kapasiteitsbou van akademiese personeel van CEN, die UG en van ander deelnemende lande speel.

Sy sê hierdie hele inisiatief is te danke aan die uitmuntende werk wat dekades lank al deur een van die NWU se staatmakers in voedingsnavorsing, prof Este Vorster, gedoen word. “Sy is ’n merkwaardige navorser met ’n passie vir voeding wat talle deure vir voedingsnavorsers in Afrika oopgemaak het.”

Dr Dolman sê die belangrikste doelwit van die samewerking is om voedingsnavorsing en leierskapasiteit in Afrika te vestig en te versterk, en om kundiges in voeding te ontwikkel in verskeie lande wat toenemende wanvoeding in die gesig staar.

By die afskop van die tweede fase van die samewerkingsprogram is van links dr Matilda Asanté, hoof van die Departement vir Voeding en Dieetkunde by die Universiteit van Ghana, prof Fré Pepping, verteenwoordiger van die Nutricia-navorsingstigting en die Universiteit van Wageningen in Nederland, dr Robin Dolman, projekleier van die Sentrum van Uitnemendheid vir Voeding by die NWU, en prof Edelweiss Wentzel-Viljoen, buitengewone professor by CEN.